एसिसी यू-१९ एसिया कपको आफ्नो पहिलो खेलमा नेपाल पाकिस्तानसँग ७ विकेटले पराजित भएको छ। जितको लागि १ सय ५३ रनको विजयी लक्ष्य पछ्याएको पाकिस्तानले २६.२ ओभरमा ३ विकेट गुमाउँदै लक्ष्य पूरा गर्यो ।
पाकिस्तानको जितमा अजन अविस र कप्तान साद वैगले अर्धशतक प्रहार गरे। अविस ५६ रनमा अविजित रहँदा वैगले ५० रन बनाए। मोहम्मद जिसन २० रनमा अविजित रहे। नेपालका लागि गुलशन झाले २ तथा आकाश त्रिपाठीले १ विकेट लिए।
त्यसअघि टस हारेर पहिले ब्याटिङ गरेको नेपालले ४७ दशमलव २ ओभरमा अल आउट हुँदै पाकिस्तानलाई १५३ रनको लक्ष्य दिएको थियो। नेपाल ब्याट्सम्यान पाकिस्तानी फास्ट बलर सामू खुलेर खेल्न सकेनन्।
नेपालका लागि उत्तम मगरले सर्वाधिक ५१ रन बनाए। यस्तै दिपेश कडेलले ३१ रन बनाए भने अर्जुन कुमालले २१ रन बनाए। अन्य ब्याट्सम्यानले दोहोरो अंकमा रन बनाउन सकेनन्। पाकिस्तानका मोहम्मद जिसनले सर्वाधिक ६ विकेट लिए। अमिर हसनको नाममा २ विकेट रह्यो।
