काठमाडौं – नेपाली राष्ट्रिय क्रिकेट टोलीका कप्तान रोहितकुमार पौडेलले टी–२० विश्वकपमा छनोट हुनु नै आफूहरूको एकमात्र लक्ष्य रहेको बताएका छन्। आज आयोजित पत्रकार सम्मेलनमा कप्तान पौडेलले पहिलेका सबै कुरा बिर्सिएर विश्वकपमा छनोट हुने एकमात्र लक्ष्य आफूहरुको रहेको बताए।
उनले पछिल्लो समय ब्याटिङमा राम्रो सुधार आएको पनि बताए। उनले छनोट खेल्ने सबै टोली उत्तिकै बलियो रहेको भन्दै कुनै पनि टोलीलाई आफूहरुले हल्का रुपमा नलिएको बताए।
पौडेलले घरेलु मैदानमा हुने छनोट खेललाई आफूहरूले ठूलो अवसरको रूपमा लिएको पनि उल्लेख गरे।
त्यस्तै प्रशिक्षक मोन्टी देसाईले कुनै पनि टोलीले विपक्षीलाई कमजोर आक्न नहुने बताए। नेपाली टिम लयमा रहेकाले आफ्ना कमजोरीलाई सुधार गर्दै अघि बढ्ने उनले प्रतिबद्धता जनाए। एकपटकमा एउटा खेलको रणनीतिका साथ अघि बढ्ने उनको भनाइ छ।
त्रिवि क्रिकेट मैदान र मूलपानी क्रिकेट मैदानमा सोमबारदेखि विश्वकप छनोटका खेलहरु सुरु हुँदैछन्। सोमबार हुने खेलमा नेपालले सिंगापुरसँग त्रिवि मैदानम खेल्दैछ। खेल नेपाली समय अनुसार बिहान ९ बजेदेखि सुरु हुनेछ।
नेपाल रहेको समूह ‘ए’ मा सिङ्गापुर, ओमान र मलेसिया छन्। समूह ‘बी’ मा यूएई, बहराइन, हङकङ र कुवेत छन्।
