विश्वकप क्रिकेटको सोमबार भएको खेलमा अफगानिस्तानले पाकिस्तानलाई पराजित गर्दै ऐतिहासिक जित दर्ता गरेको छ। भारतको चेन्नईमा भएको खेलमा अफगानिस्तानले पाकिस्तानलाई ८ विकेटले पराजित गरेको हो ।
अफगानिस्तानले पाकिस्तानलाई एक दिवसीय क्रिकेटमा पहिलो पटक पराजित गरेको हो । यसअघि सात पटक प्रतिस्पर्धा हुँदा सधै पाकिस्तानले जितेको थियो । अफगानिस्तानले इंग्ल्याण्डपछि पाकिस्तानविरुद्ध पनि इतिहास बनाउन सफल भएको छ ।
चेन्नाईमा पाकिस्तानले दिएको २८३ रनको लक्ष्य अफगानिस्तानले ४९ ओभरमा २ विकेट गुमाएर पूरा गर्दै ८ विकेटको शानदार जित दर्ता गरेको हो ।
अफगानिस्तानलाई जित दिलाउने क्रममा इब्राहिम जादरानले सर्वाधिक ७८ रन बनाए । त्यस्तै, रहमनुल्लाह गुरबाजले ६५ रन जोडेका थिए । रहमत शाहले नटआउट ७७ र हसमतुल्लाह शाहिदीले नटआउट ४८ रन जोड्दै अफगानिस्तानलाई विजयी बनाए ।
बलिङतर्फ पाकिस्तानका शाहिन शाह अफ्रिदी र हसन अलीले समान १-१ विकेट मात्रै हात पारेका थिए ।
टस जितेर पहिले ब्याटिङ गरेको पाकिस्तानले ५० ओभरमा ७ विकेट गुमाउँदै २८२ रन जोडेको थियो । पाकिस्तानका लागि कप्तान बाबर आजमले सर्वाधिक ७४ रन बनाएका थिउ । त्यस्तै, अब्दुल्लाह सफिकले ५८ रन जोड्दा सादाब खान र इफ्तिकार अहमदले समान ४०-४० रन जोडेका थिए ।
बलिङतर्फ अफगानिस्तानका नूर हमादले ३ विकेट लिएका थिए भने नविन उल हकले २ विकेट लिए ।
यो जितसँगै अफगानिस्तान विश्वकप प्रतियोगितामा ४ अंकका साथ छैठौं नम्बरमा उक्लिएको छ ।
