इजरायलमा हमासको हमलामा परी मृत्यु भएका १० नेपालीमध्ये चारजनाको शव आइतबार बिहान नेपाल ल्याइने भएको छ ।
तेलअभिभस्थित नेपाली राजदूतावासले जनाएअनुसार भोलि दिउँसो सवा एक बजे फ्लाई दुबईको उडानबाट नेपाल पठाउन लागिएका शव आइतबार बिहान काठमाडौं आइपुग्नेछन् ।
दूतावासले सम्पूर्ण कानुनी प्रक्रिया सकेर ती चार शव नेपाल पठाउन लागिएको जनाएको छ ।
‘इजरायलबाट फ्लाई दुबईको उठान नम्बर एफजेड १२१० विमानबाट दुबईसम्म र दुबईबाट फ्लाई दुबईकै उडान नम्बर एफजेड ८३५१ बाटठ काठमाडौंसम्म पुग्ने गरी व्यवस्था मिलाइएको छ,’ दूतावासले जारी गरेको विज्ञप्तिमा भनिएको छ, ‘फ्लाइट डिटेलअनुसार कात्तिक ५ गते आइतबार बिहान ती चार शव काठमाडौं पुग्नेछन् ।’
दूतावासले अन्य शव पहिचानको काम चलिरहेको पनि जनाएको छ । यस्तै, उपलब्ध सम्पूर्ण सञ्चारमाध्यमहरूको प्रयोग गरी सम्पर्कविहीन रहेका विपिन जोशीको खोजी भइरहेको पनि दूतावासले जनाएको छ ।
