काठमाडौं – डा. गोविन्द केसीले पुष्पकमल दाहाल प्रचण्ड, शेरबहादुर देउवा र केपी ओलीहरुको उठवस माफिया, दलाल, विचौलिया, भ्रष्ट र अपराधीहरुसँग भएको आरोप लगाएका छन्। बुधबार प्रेस विज्ञप्ति जारी गर्दै डा. केसीले उनीहरु दशकौं देखि आमनेपालीहरुको सम्पर्कबाट बाहिर रहेका बताएका हुन्।
‘उनीहरुको उठवस भनेको माफिया, दलाल, विचौलिया, भ्रष्ट र अपराधीहरुसँग छ। उनीहरूसँगको सह-अस्तित्वमा नै उनीहरू कूर्सीमा टिकेर बस्न सफल भएका छन्’, केसीले भनेका छन्।
उनले हालका स्वास्थ्यमन्त्री का गैरजिम्मेवार मन्तव्य र क्रियाकलाप र मापदण्डविनाका गुणस्तरहिन जनशक्ति उत्पादन गर्ने शिक्षालयहरु गैरकानूनी ढंगले खोलेर ठगी गरी खान पल्किएका काला व्यापारी र सीटीईभीटीका भ्रष्ट राजनीतिक कार्यकारी पदाधिकारीहरुले निहित स्वार्थ पूरा गर्न आयोगलाई विभिन्न तरिकाले दबाब दिइरहेका बताएका छन्। ‘यो दुर्भाग्य को कुरा हो। यस घटनाले हाम्रो गम्भीर ध्यानाकर्षण भएको छ’, उनले भनेका छन्।
चिकित्सा शिक्षा ऐन चिकित्सा शिक्षाविदहरुको महिनौंको अध्ययन अनुसन्धानबाट तयार पारिएको प्रतिवेदन भएको बताउँदै उनले प्रचण्ड, मोहनबहादुर, देउवा र ओलीको माफिया मैत्री ईच्छा र हुकुम ले नभएको जिकिर गरेका छन्।
डा. केसीले यस्ता क्रियाकलाप बन्द गरेर आफ्ना मागहरु पूरा नगरे कुनै पनि बेला सत्याग्रह सहितका सशक्त आन्दोलन गर्न बाध्य हुने चेतावनी पनि विज्ञप्तिमार्फत दिएका छन्।
