काठमाडौं – प्यालेष्टिनी सुन्नी इस्लामिक कट्टरपन्थी सङ्गठन हमासले इजरायलमा गरेको हमलापछि उत्पन्न भएको युद्धको अवस्थाका कारण हालसम्म ११ सय बढीको मृत्यु भइसकेको छ। इजरायलमा अहिलेसम्म कम्तिमा ७०० जनाको मृत्यु भइसकेको छ भने गाजा क्षेत्रमा ४०० बढीको मृत्यु भएको छ।
मृत्यु भएकाहरुमा इजरायल गएका १० नेपाली विद्यार्थी समेत परेका छन्। इजरायल र गाजा क्षेत्र मात्र होइन् अहिले नेपाल पनि शोकमा डुबेको छ। सरकारले इजरायलमा फसेका नेपाली विद्यार्थीको उद्धार कार्य तत्काल सुरु गर्ने भनेपनि अझै केही ठोस प्रगति भने भएको छैन।
इजरायल र गाजा क्षेत्रमा सर्वसाधारणमा ठूलो डर पैदा भएको छ। उनीहरु चिच्याउँदै कराउँदै सहयोगको याचना गरिरहेका छन्। कतिले आफ्ना सन्तान, आमाबाबु तथा परिवारका अन्य सदस्य गुमाएका छन् भने लाखौं घरबारविहिन भएका छन्।
यसैबीच हमास र एउटा सानो ‘इस्लामिक जिहाद’ समूहले इजरायलबाट १३० जनाभन्दा बढीलाई बन्धक बनाएर गाजामा ल्याएको दाबी गरेका छन्। उनीहरुले यी बन्धकहरुको रिहाईको बदलामा इजरायलले बन्दी बनाएका हजारौं प्यालेस्टिनीहरुको रिहाईको माग गर्ने बताएका छन्।
बन्धक बनाइएकाहरूमा महिला, बालबालिका र वृद्धवृद्धासहित सैनिक र सर्वसाधारण रहेका छन्, जसमध्ये अधिकांश इजरायली छन् तर केही अन्य देशका पनि छन्।
तस्बिरहरु-
