जनकपुरधाम । मधेश प्रदेशको राजधानी जनकपुरधामस्थित गौ–हत्या विरुद्धको रैलीमा विवादस्पद र भडकाउ अभिव्यक्ति दिएको भन्दै धर्मगुरु श्रीनिवास आचार्यलाई प्रहरीले पक्राउ गरेको छ ।
आचार्यलाई मँगलबार अपरान्ह साम्प्रदायिक र धार्मिक हिंसा भड्काउन खोजेको आरोपमा पक्राउ गरेको हो । प्रहरीले उनलाई सुनसरी चक्रघट्टीबाटै पक्राउ गरेको जनाएको छ ।
उनले केही दिन अगाडि गौहत्या गर्नेहरुलाई हत्या गर्न आव्हान गर्दै चर्को भाषण गरेका थिए । गौ हत्या गर्ने जो कोहीलाई हत्या गरेर आए त्यसको आफूले जिम्मा लिने उनको अभिव्यक्ति थियो । उनले हातमा खुकुरी बोकेर भनेका थिए, ‘गौहत्या गर्नेलाई हत्या गरेर कोही आउँछ भने उसको म सम्पूर्ण सुरक्षा गर्नेछु ।
राज्यले अपराधी करार गरेर समातेको खण्डमा म उसको सबै परिवारको पालन पोषण गर्छु ।’ आचार्यको उक्त अभिव्यक्ति सामाजिक संजालमा भाइरल भएपछि प्रहरी एक्सन लिएको हो ।
सुनसरी प्रहरीका प्रवक्ता डिएसपी नविन कृष्ण भण्डारीले प्रहरी श्रीनिवासलाई प्रहरी कार्यालयमा उपस्थित गराउन नियन्त्रणमा लिइएको बताए । यसअघि आचार्य आफैँलाई गोली हानेको आरोपमा पक्राउ परेका थिए । २०७४ चैत २५ गते उनलाई गोली प्रहार भएको थियो । तर, अनुसन्धानका क्रममा आफैँले योजना बनाएर गोली हान्न लगाएको देखिएपछि आचार्य पक्राउ परेका थिए ।
